那天的一人一故事培訓，其實有心想考考演員的演譯能力，當然，最後五體投地，佩服！主持人未叫我分享故事，想演譯一下我當時的感受，我話心大心細，唔知講邊個故事好？佢地演譯得好好。

一個就係五歲小朋友關於“手”故事，發表過啦，另外，一個就係以下：

話說小朋友時候，睇電視是最好的娛樂， 下晝未有430穿梭機， 無乜卡通片，超人唔係成日播，最多就係粵語長片，我地叫粵語殘片，題材好多，最唔鐘意梗係粵劇大戲啦，悶死人，呀，當然長大後覺得這門藝術非同小可，但小時候唔識欣賞，成日懷疑國家積弱，打仗同做大戲咁樣，唔輸都唔得啦。

最鐘意武俠片，我地細個識得唸呢段順口溜：千手神拳，如來神掌，霹靂金較剪，武林第一劍，六指琴魔，勾魂鬼爪，白骨陰陽劍…無字天書。其實故事與當中的“六指琴魔”套片有關。

細個時，男仔女仔分得好開，男仔唔可以偷睇女仔去厠所（哈哈，而家都唔得），當時應該風氣好保守，羅蘭喺戲裡面曾經著泳衣，俾人當係壞女人，狄娜出場，大人會用手擋住唔俾你睇，“Kiss”好似都好大罪，可以終身監禁咁啦！總之，好保守。但係，細路仔對呢樣嘢，總會好奇…

話說六指琴魔套戲，故事唔記得，嗰個係第一次俾我睇到女姓身體嘅演員（好似好誇張，你讀落去就知…)，叫李居安，其中一段劇情，話說李居安，男扮女裝，膊頭中了仇家一掌，避入山洞，男主角幫佢療傷，除咗佢件衫，不得了，無家長指引下，李居安的身體呈現在我眼前，唔記得掩眼，赤裸裸嘅鏡頭…我嗰陣好細個咋，死啦，罪過罪過，好似犯咗色戒咁…犯罪感一直到長大。

大個了，識性。回想起，覺得超低能，勁搞笑。其實所謂赤裸裸嘅鏡頭，當時的畫面只係露出咗膊頭一角，可能係保守兼夾無人指導，以為咁樣就係唔著衫，總之唔睇得，嚇咗自己好多年，性教育真係要推行㗎…還有…我成日覺得女性身體係白淨無瑕，又係同六指琴魔呢段片段有關，鬼咩，嗰套六指琴魔係黑白片，李居安個膊梗係白凈啦，黑白片嘛…你而家試下高清彩色吖，幾多咩嘢呢…?

回想起，講俾人知都笑死啦，而家啲細路會唔會對性係咁無知呢？應該唔會，社會無咁保守，資訊獲取容易…互聯網，搜尋器，乜都得啦，家長們要小心呀。

自己在這方面的啟蒙故事…真是笑話，但也是好珍貴的回憶，趁住仲係記得清楚，要記下來。