五歲的我，天空係藍色的，雲係白色的，似官崎駿卡通裏的天空一樣。

家境清貧，徒置區，舊屋村，家家戶戶都係咁。

小時候，男仔唔會同女仔玩，會俾人笑係女人型，男和女特別分得開。

爸爸工作的公司，係賣鈕扣拉鍊，他的收入嘛，應該唔多，但好多時有好多聯誼，打乒乓波，游水，食乳鴿…厘方面，算係多福利。

有次我地去游水，我唔記得咗係即興抑或我地窮得滯，好似無錢買（無帶）泳褲，佢地話唔緊要，著住嗰條短褲一樣啫，好老尷(尷尬）。

事頭有幾個仔女，係我心目中，佢地係有錢人，距離好遠，做朋友仔嘛？完全無想過喎。去到一個碼頭，當時係好簡陋，好似欄杆都無。事頭婆同我講：霖（我的名字），幫我拖實邊嗰啦（我唔記得咗佢個名，嗰樣都唔記得。）吓？叫我拖住佢個女？佢係女仔嚟嗰喎，得唔得㗎？除咗我啲家姐，我未掂過女仔…。但係事頭婆叫喎，我係咪要聽話呢，我係咪要保護佢呢？我行埋去，我唔記得佢著乜嘢衫，佢個樣都唔記得。但係，我隻手由下而上拑捉（拖）住佢隻手，我捉到好實，佢又好似無爭扎…自已好似都好英，好man咁，能夠保護佢個女，多好！

乜原來女仔隻手係咁樣，原來有錢女仔隻手係咁樣…，當時心有跳，但係有無面紅就唔記得，但嗰種感覺，我仲記得…及後的歲月，我都拖過其他女仔嘅手，無一個係咁，要用文字表達？好滑，無骨嘅。再具體啲，紋理細膩無瑕…如果俾我再拖多一次，我應該記得，咁似灰姑娘對玻璃鞋嘅，哈哈。

佢地問如果真的搵返嗰隻小手，你會點？我相信永遠找不到，因為這只是一個五歲窮家小男孩的記憶，和年長後磨滅不去的＂那些年＂印象。