七十年代初，有一部配音劇叫＂侵略者＂，講的是外星人侵略地球，細細個就好鐘意睇…佢地會化身人類，但有個特徵，手指尾不能屈曲…有句對白：星球人已經嚟咗喇…嚇得我好驚，仲成日留意人地隻手指尾。
初中時，去旺角一間書局買咗本＂神祕的飛碟＂，好好睇，陪伴我好多個夜晚，一路讀一路諗，想像無彊界，超越許多領域，跟住買咗本＂不明飛行物＂，又買咗本＂神祕的百慕達三角＂，再買一本叫＂鐵幕國家的幽浮事件＂，仲有好多科學雜誌同報紙，凡是有關UFO都買，跟住剪，跟住貼在一本大畫冊到，…同啲同學吹水，搞到好似一個飛碟專家咁款。
那年那天，英文作文堂，寫了一篇有關人類同外星人接觸的短文，嗰期攞到最高分，仲同老師講ufo的正確全寫是＂unidentified flying object"。
史提芬史匹堡的第三類接觸，如痴如醉，那些年抬頭望天，成日希望見到呢啲光點…但可惜，見唔到啊，我屋企門口對住有個山，個山好似套戲飛碟降落個咁樣，成日幻想山頂會唔會有飛碟，同外星人呢？

出嚟做嘢，放低好耐，偶然睇下啲相關科幻片都有啲睱想，直至亞視有套超低能勁搞笑的解剖外星人（播咗兩個星期），覺得真係嗰句：超低能勁搞笑。
後來羅茲威爾又熱炒，呢，1947年有飛碟墮落美國新墨西哥州的事件，話美國政府收起殘骸同埋外星人屍體呢？好多陰謀論，好鐘意睇。
Big boys club嘅Danny summer同埋卓飛講ufo…我都鐘意睇，最近又講2012年12月21的末日預言，又傳話三隻碩大無朋的母船，會來地球…但唔係救地球，係射殺地球人。信？佢都傻啦。
We are not alone!
The truth is out there!
神祕事物永遠都有佢嘅吸引地方，見到外星人？唔使話俾我知，自己執生就得喇。