清明時，姪兒問起有關他爸爸（即是我哥哥）的奇聞迭事，一時之間，回朔一同生活一同長大的光景，世事如煙。

哥哥在他幼時已離去，他想我將零碎的點滴如砌圖般併起，好讓他想像他爸爸是甚麼人，這點我又怎會做不到呢？

我 不只有哥哥，還有姐姐和弟弟，哥哥和我甚要好，他給我的印象是正義的化身，有一次，我唔聽話在街上小販買荳漿飲，阿媽唔俾我地咁做因為好污漕，就中招肚 痛，佢見到我肚痛，問我點解，我唔肯講，佢氹我講，話唔會話俾阿媽知，我講出事實，佢二話不說，走到媽媽告狀，我俾媽媽責罰了一頓，嘿，好一個無間道！話 雖如此，都係為我好，同埋佢認為小朋友唔應該隱瞞做錯事，哈～～，唔做警察真係浪費了。

哥哥算是大隻，時常帶我到摩士公園玩碌地沙，在公園的小山上碌落山下，想到玩乒乓波，到泳池游水，扮李小龍打架…一幕幕的就是兒時寫照，好似歲月神偷…套戲。

哥哥好喜歡科學，或者咁講，好喜歡太空科幻飛機大炮，又鐘意大講特講吹水，但講到似層層，起碼我是他的聽眾，有一次睇完第三類接觸（一套講外星人的科幻 片），回家途中，望住星空，兩兄弟喋喋不休，星球人飛碟百慕達，大拋理論，吹得就吹，好享受大家似朋友多過係兄弟的感覺，哥哥，每次我睇返啲舊西片，我都 想起和你一齊睇戲的情景。

哥哥都有教訓我的時候，我自己算是倔強，唔聽就唔聽，兩兄弟打架都時有發生。不過，當時的屋邨，家家都如是，真是誰家灶頭無煙火呢？哈哈～～唔知有無用錯到。

我和哥哥瞓碌架床，他在上格，我時常爬上上格，偷睇佢做乜，他喜歡聽粵語流行曲，他的年代是用錄音機放錄音帶，最多的是麗莎，所以我識好多當時的流行曲，分飛燕，百花亭之戀，一水隔天涯…係多得佢。

呀，想到細個時哥哥拖我隻手，因為細個時我地習慣大個會拖細個，出咗事大的會被罰，所以我俾佢拖住唔出奇，佢隻手掌都幾厚，幾暖，俾佢拖住都有安全感。

我會跟住佢頭，佢玩玩具，我又跟佢玩，拍公仔紙，我又跟佢拍，佢睇公仔書我就跟佢睇公仔書，哈哈～～

兒時的藍天唔見了，我地一齊瞓起地向天上望住個天睇雲的時光逝去了，但印像印在腦裏，好深好深。

上世紀末，他離開了，對爸媽姐妹弟有愛，對妻兒也盡愛，對朋友盡義，對委屈不平的事也有恕，他是我心中的典範，曾有些事要處理時，如果他在佢一定會要我咁咁…他影響到我。

我還記得他拍拍我的膊頭，佢話：無論你決定如何，怎樣我都企响你嗰邊！義無反顧。有一套戲叫“我的兄弟姐妹”，我哭了，因為我覺得當中有我倆的情誼。

人地話發夢都會笑，我曾經在夢中發到哥哥，但我夢中都會喊。哥哥，我掛住你，尤其在清明時。

給我的姪兒：係我最情真的回憶印象，我也要趁我未忘記的時侯話你知。