我記得我細個有張學生相，和我的最細弟弟好似，但有人話同爸爸都好似樣，但我覺得細佬似啲，我高啲同埋背“寒”啲（姿勢唔好，用得電腦多）。

• 爸爸個子唔高，但媽媽都係。
• 爸爸雖然沒有甚麼文化，但寫字都唔錯，我手字同佢差唔多。
• 爸爸後生時搵錢唔多，但花費在我們身上倒不少，尤其在娛樂方面，起碼在記憶中遊樂場，睇戲，旅行游水，去飲茶（偶然會搭的士），下午茶，食消夜，去澳門玩…講出來好似有錯覺以為係有錢人家，哈哈～～
• 少時做暑期工和爸爸一齊共事，佢好受歡迎，食午飯常常和同事談笑風生。
• 爸爸鍾意細路乖，我地一曳就大鑊，不過我就打少啲，所以佢話算係𡃶我啦，哈哈～～
• 一次和爸爸看恐佈片，夜晚攬實佢隻腳瞓，一次閒談佢話記得，太神奇啦！
• 爸爸係大男人，我想有好多事佢也扛在自己上，哥哥因病走了，我也看到他的悲傷痛哭，我未曾想像過是如此。
• 爸爸永遠覺得我未長大（媽媽都係），飯局未開始總是電話打來問：位置？到了未？哈哈～～我算是交帶的人喎。
• 我好怕爸爸身體有事，多年前因為唔舒服，我陪佢照胃鏡，在房外聽到佢痛到叫咗出來…回到家中，我也喊咗出來。最近的一次飯局，食得急飲了少許紅酒，嘔過不停，心下難過。
• 退休後的爸爸沒有甚麼朋友，我帶他和媽媽去我中心，佢地都覺得好熱鬧，媽媽還說要學電腦，可惜沙田遠了些…。
• 有陣時，夜晚醒來，我會想我似爸爸啲乜，我想好多嘢都似，畢竟是父子，DNA真神奇，有趣的是一些口味也似，爸爸，我和姪兒都喜歡食一隻餅乾…是嘉頓威化，連味道也一樣，是朱古力威化…有趣！還有，我想是我們都一樣會有固執…只希望是擇善固執就好了。
• 我好僧人講：點解我老豆唔係“李+成”？我想是誰的子女，任何人也沒法選擇！係緣份。呀，你會話講笑啫，我會話：咁多笑好講講第樣啦！
• 看爸爸年青時的照片，我無必要擦鞋，但真的要說句幾英（俊）喎！媽媽係鍾意這類型，哈哈～～

我自己一定唔係孝順啦，雖然盡量唔令佢地擔心，但好多時又令佢地憂心，唯有盡量乖啦。

當我同人話：

我似爸爸！

我是挺起胸膛和挺直腰板的啊。