唔好誤會這標題，阿女細個的時候，我地好鍾意搵藉口去食嘢，去KFC食朱古力布甸，（佢阿婆話：佳酸李最鍾意食,,,看得明嗎，係啲鄉音啊，哈哈～～)，去Seven買甜筒，去老麥食雪糕…。為咗美其名，我地話去做啲親子活動，父女溝通一下，去老麥其實食雪榚是重點，你一句我一句， 無乜重點，無里頭，我食朱古力筒，佢鍾意食麥旋風，古太怕肥好少食，咁樣溝通，足唔足夠呢？

有一次，為一件小事大家拗到爭持不下，面紅耳赤，突然間我話：不如去食雪榚囉。佢先呆一呆，話：都好吖。哈哈～～齊齊開心食雪榚去，化干戈為食冰淇淋…，但係我就覺得佢唔夠吉士，我地而家講起都唔記得咗拗啲乜，佢就話唔記得那天食啲乜。

佢成日話我蝦佢，凍飲品請我飲一啖，我大力一吸會飲咗成半杯…激到佢…哈哈～～所以整整下我再飲佢杯凍飲品，佢會用力捏住飲管，等我飲唔到…

多年前有一個學生同我講：

好好珍惜女兒坐在你大脾（腿）…因為轉眼就過。諗返起如昨天，但其實歲月就咁俾神偷偷咗喇！

呀，如果寫成俾漢寶神偷偷咗係咪得意啲呢？