古老師試過有段時間，不在家中吃飯，餐餐出外，吃厭了外邊晚餐，好怕，偶一為之就無問題，始終住家飯最好！回家吃飯，兩餸一湯，簡約可口，其樂無窮，要感恩！

女兒在我倆面前，我自問幾惡和嚴，當我倆同一陣線，肯定無(訂)企，但她已長大，漸漸都要有她發言空間，有陣坐下來吃飯時都會試吓爸媽底線，咀多多，挑戰長輩權威。

在一張長飯檯，我倆相對而坐，女兒在旁，品字形的三角，咦？又像三國，即是魏、蜀、吳，有陣對疊，時而靠隴、時而攻擊、時而防守，對奕針鋒，趁火打劫，乘虛而入，就在這三乘五尺的版圖上出現！語言攻防對白選錄如下：

“媽咪，你老公(點解咁稱呼？)今日又飲可樂，我話過佢唔聽…仲有，佢好似又買玩具放咗入背囊到…爹哋，你睇你老婆(點解咁稱呼？)幾論盡…又唔記得…。亞女，晾咗啲襪好多日，熟晒啦，仲唔擇落黎！…”

最近談到疑似藝人不 雅照，其實我一張都未睇過，有親戚知我做資訊科技這行，竟然問我有沒有，傻瓜，做電腦就有這些相咩！女兒話有人講其實影這些相在外國好平常，只不過香港人 尤其是中國人將自己的價值觀給年青人，所以大驚小怪，又試挑起了我大發理論的神經，想話問題是她們是公眾人物，要有社會良心，講就講咗幾句，想起她曾說我 講道理的時候好誇好激，似廖偉雄(即係啊燦)…她其實是想激我…心想了一下，算啦。

跟住，突然，放下了筷子，淡淡的說：

『實不相瞞，其實我就係奇拿！』

得來的反應是向我…噴飯！哈哈聲不絕！她們認為是08年的最大笑話！

這種既三角又三國的關係，非局中人能領略，有的話要感恩要珍惜，知道嗎？