多年前的一個黃昏，上班途中，〈註：古老師以前的上班時間和一般人相反〉 在銅鑼灣鬧市，口哼唱著歌，鬆毛鬆翼，十分投入，眼前一位整齊端莊，明麗照人，好似幾靚的女士打個照臉，以下是我的記憶畫像。

我不識應對，只說：『做乜放咗工唔返屋企？』跟住相對笑了一會，在繁華街頭，老婆捉到老公，唔係走私，係唱歌，想起臉兒也熱紅，自始，出街要留意四週。

原本那個星期五的下午是休假，好同事的音樂治療分享正好在那天下午舉行，事前給了我看當天一首要分享的舊歌，是林子祥、劉天蘭和詩詩的『三人行』，但我又要休假，搞到我內 心鬥爭了一段時間，好不好留下來參加這節目呢？終於，因為有些工作未完，所以有幸參與，玩音樂，唱唱歌，給“治療”得很好哩！

同事曾問我喺屋企係咪成日唱歌比古太聽，我話佢哋唔係好欣賞，一般評論如下：

• 走音，調子拉得太高！
• 咬字唔正！
• 唔夠氣就咪唱啦！
• 啲歌太Out(落伍咁解)！
• 太大聲，嚇親隔離街坊，因住比人投訴！
• 毛管動，打冷震！
• 好彩你唔係入娛樂圈，否則拖冧整個歌唱界，踏入黑暗時代！

每句評語，如刀刺心，令我在唱歌的自信心墮進低谷…哇！不過，我唔理佢哋冷言冷語，依然故我，還唱著『昂然踏著前路去…』。

我有陣覺得我唱的歌是有感染力，會觸動人心，例如，亞女向古太投訴完我唱的歌太舊，但一陣佢自己竟然又會哼出同一首歌，心想，矛盾唔矛盾呀？

同事常取笑古老師常常借機想展歌喉，但又扮到唔想唔想，好似比人迫咁，好搞笑，佢都講得幾啱，一‧真的是想搞笑，二‧我真係好似古巨基那句名句：

『我…真係…好鍾意唱歌…㗎！』

這名句是出自古巨基演唱會尾場的心聲，有興趣上Youtube找找吧！