一聽到有小朋友(幾歲大)扭計，大吵大鬧，我行行吓街都會停步，甚至返轉頭，想睇嘢。

睇乜？好想睇吓家長點應付，會唔會郁手，或會好言相勸，或妥協？好多時都失望，多數無嘢睇，又唔打又唔鬧，甚至教都唔教，由得小朋友大叫、狂跑、瞓地…嘈暄巴閉。

在地鐵最多嘢睇，細路哥一人瞓住咁霸三四人坐位，玩雙臂或單臂迴(吊)環、扮消防員緊急出動鑽鐵管，拳腳狂砌隔離菲傭或印傭，用條脷同玻璃濕吻，最有趣是四週無人出聲，眼神也不接觸，個小朋友係邊個嫁？我無誇張，在地鐵東鐵西鐵、九巴新巴城巴等集體運輸系統，日日放映。

有次在大家樂吃早餐，隔離有個小朋友，將枱面樽鹽倒在枱面上，堆了一大堆，用手指挑撥，又係無人理，突然我沉聲說：『你唔可以咁玩，好浪費喎！』他先是呆了一呆，跟住傻笑，扮可愛，我先先以為他會撥返D鹽落個樽，點知佢用條脷去舔嗰D鹽，真係無計，聽呀女話算啦，唔好理。

我 住頂層，有次和兩位小朋友一同乘電梯，6至7歲，應該是表兄弟，唔會同你打招呼，只會大呼小叫，旁若無人，及至中層，有個好似和他們相識的女士入電梯，用 手摸其中一個的小臉蛋，即時怒睥，跟住另一個，大喝：『我哋會殺人嫁！』可憐這女士只有陪笑，連忙縮手，電梯內所有人側目，而她希望部電梯快些到地下，面 都矇哂，及後，我和古太改了他們的花名，叫『頂樓雙雄』，可能他們睇得黑社會片多。