到親戚處吃飯，談到養魚，我家的小錦鯉和大長金當然是話題，但提及有無生魚仔，口啞語塞，唔知點解我家小錦鯉唔生魚仔，原因可能係全部都係雄性，或者全部都係雌性。

期間，望到親戚個魚缸養有幾對接吻魚，咀對咀啜起上，十分有趣，咁傷風化，一定要影，拿起手機，set好鏡頭將景像拍下來，點知好似知到我會拍照，當我係狗仔隊，點都唔肯再接吻！這天晚上，耗了一頓飯，再也拍不到接吻照！氣人啊！他們郤笑過不停！

有陣都會見到時下年青男女，大街大巷，相擁嘻笑，狀甚親熱，旁若無人，摟抱熱吻，自己雖年介中年，也不免搖頭…不過自己也曾年青過…不應太大驚小怪才對。但有趣的鏡頭，不止一次，讓我說出來，看看有冇其他人都見過？

在一些大商場，有一些長長(跨越2至3層的)的行人電梯，一對男女，女在前一級，男在後，女的回頭，由於女的較婑，一 回頭摟向男的，高度正正是頭對頭，自然咀就對咀，互相發功，渾忘自己在行人如鯽的大商場，旁觀者眾的地方，自己有陣都唔係幾想睇，但他們只在我前面，行人電梯又咁窄，唔通叫他們唔該借借…比我過咩！究竟咁啜法係咪叫做有膽色呢？使唔使大叫：『I am the king of the world!』又或者想表現戀愛大過天呢？〈我覺得佢哋好似那套鐵達尼對男女主角的You jump I jump咁轟烈咁泣鬼神吧！我心想最多比你唔夠一分鐘，呢段旅程就要完結，你吔咪要分開…對咀，阻住晒！〉唔係幾明他們的心態，唯一的解釋是他們想表達他們的愛情power啩！不過仲係著住校服喎！

以上的案發地點包括：新城市廣場、德福廣場、新世紀廣場、荷里活廣場…等等的長電梯，點解是長電梯？我想短的電梯唔夠時間啩？你又有冇見過呢？